بغداد

عمت عيني عليج وليش يابغداد

موجنتي على ليلج هذا محسودة

ماشوفج مدينة وظاوية وتزهين

اشوفنج نذر للموت مكيودة

ودجلة بياوجه للخضر تهدي شموع

اذا صارت جرح عالكاع ممدودة

وسكتتنة صليب وصرتي عيسى عليه

اغسلي ايدج بعد تبقين مشدودة

لان ريح الحقد رجف اهواي اكلوب

وثكل كلش حقدها وحيل مهدودة

بس باب الحوائج باقي والنعمان

وبقيت البوب كلها بخوف مسدودة

امام بكل جرف مثل العلم مرفوع

وشاهدنة الجسر عالخوة موجودة

وشدينة الجرح وانكطع حبل الخوف

وكحلنة الجفن وانسدت العبرة

بعد مانطي لزمة انضم ملح بالماي

ميزنة الحروف ووضحت الجفرة

مانغلط بعد وانصير مثل الخيط

تحطنة على الفتك واتعوفنا الابرة

عود احنة ويبسنة انصير ماشة نار

مو بينة الحفر والغيرنة المجرة

تجوينة نعم نكطع هواها اتموت

كافي اضل عمر بجفوفنة الجمرة

وحلمنة الليل يصلب والخمروالطير

والف يوسف اجانة ومحد ايفسرة

مانعرف مشينة اوياهم امغمضين

دفعونة وكعنة وغطو الحفرة

والجفة طول مدها وطلع وارتاح

وابو النفس العزيزة الهسة بالنكرة

رظيت اصبح جسربس ردت اشوف الماي

يمشي اكبال عيني وماردت كطرة

ردت سوطي امس توعدني بالتفاح

وصلت المنصبك تحجيلي عالخظرة

نفس الفائدة الموجودة بالتفاح

بس هاي بحمار وهاي لاخظرة

كافي اظم علي اعرف شنواليصير

سيل الدم اعرفة وياهو اليفجرة

وانة الميت اعرفة واعرف الدفان

اشوكت ماريد اروح واوصل الكبره

وكافي من العتب وانلومها من اطيح

على الفاس اشبديها ونحجي عالشجرة

ولاذنب النهر لو عكس مجرة الماي

الكاع اتصير رخوة وتعكس المجرة

وخد الينصطر شيفيدة تبجي العين

اشما صبت دمع ماتمسح الصطرة

اليحفر كصتة بفاسة صبر يرتاح

بعد فنها تطيح وتوكع الكطرة

وبية اشكد عتب واشكد ملامة وحيف

على الدمع البجيتة وماطفت حسرة

على الردلي ايتبختر لافرس لاسيف

ويحجي بكل رهاوة وطعنتة بظهرة

على اليوكع فريسة اشلون يغفة الليل

ينـــام بياوجه واذيــــاب التنــــطرة

مثل شذرة الكرامة ومحبس الانسان

وبيها اشكد محابس ذبت الشذرة

م/ن